Presidenti Stevo Pendarovski sot i mirëpriti përfaqësuesit e Lidhjes së skautëve të Maqedonisë, të cilët e njohën me aktivitetet e parapara me rastin e 70-vjetorit të ekzistencës së skautëve në shtet dhe me Takimin maqedonas të 13-të të skautëve, i cili do të mbahet me mbështetje nga Presidenti Pendarovski në periudhën nga 12 deri më 21 korrik në Krushevë.
Në këtë takim, skautët e informuan Presidentin mbi përgatitjet dhe nevojat aktuale me qëllim të organizimit të takimit të skautëve, si evenimenti më i madh rinor edukativ në hapësirë të hapur, i cili bashkon dhe promovon vlera kulturore, shoqëri dhe shkathtësi. Në takimin, të cilin e organizojnë në çdo pesë vjet, pritet të marrin pjesë mbi 1500 skautë nga Maqedonia e Veriut dhe nga mbi 15 shtete nga rajoni dhe nga Evropa.
Presidenti Pendarovski theksoi se është kënaqësi e madhe për të që është mbështetës i këtij takimi ndërkombëtar, i cili përveç komponentit edukues dhe fitimit të shkathtësive nga të rinjtë, kontribuon edhe në afirmimin e shtetit tonë. Në këtë drejtim Presidenti i përgëzoi për programin dhe entuziazmin për kultivimin e vlerave të bashkësisë, solidaritetit, empatisë, disiplinës dhe punës në ekip.
Në bisedën me përfaqësuesit e Lidhjes, Presidenti shprehu mbështetjen për programet e tyre për vullnetarizëm dhe zbatim të programeve edukative për rritje dhe zhvillim personale, si dhe të edukimit joformal të cilin e praktikojnë nëpërmjet aktiviteteve në natyrë dhe fitimit të shprehive të shëndetshme jetësore.
