Presidenti Stevo Pendarovski, sot mbajti fjalim në Samitin e kryetarëve të shteteve dhe qeverive të vendeve pjesëmarrëse në Procesin e bashkëpunimit të Evropës Juglindore (PBEJL), që në suazat e kryesimit turk po mbahet në Antalia, Republika e Turqisë.
Në fjalimin e vet, duke e theksuar rëndësinë e bashkëpunimit rajonal, Presidenti Pendarovski theksoi se, në suazat e PBEJL-së, në periudhën e kaluar arriti rezultate të rëndësishme, si në sferën politike ashtu edhe në atë ekonomike, sociale dhe të sigurisë.
“Ne jemi relativisht të vogla si vende dhe ekonomi, por së bashku jemi të fuqishëm. Fakti se kemi dallime dhe qëndrime të ndryshme mbi anëtarësimin në aleanca të ndryshme ndërkombëtare, nuk e përjashton bashkëpunimin më të afërm në të gjitha fushat sektoriale të interesit të përbashkët”, tha Presidenti Pendarovski, duke folur mbi pandeminë e kovid-19, e cila imponoi gjetjen e mënyrave të reja të bashkëpunimit, duke i dhënë prioritet rimëkëmbjes ekonomike të rajonit të Evropës Juglindore.
Strategjia e EJL-së 2030, që duhet të miratohet sot, theksoi Presidenti Pendarovski, është një moment historik për bashkëpunimin rajonal në Evropën Juglindore, kurse zbatimi i saj pritet të kontribuojë në prosperitetin e zmadhuar, në cilësinë më të mirë të jetës dhe të ndihmojë rajonin që t’i arrijë qëllimet e vendosura nga familja globale e kombeve.
Në kontekstin e procesit eurointegrues Presidenti Pendarovski theksoi se shtetet e EJL-së kanë vazhdimësi të përbashkët historike, civilizuese, kulturore dhe ekonomike, prandaj duke pasur parasysh komplikimin e transformimit të nevojshëm “Qëndrimet e ndryshme për disa çështje historike madje edhe midis aleatëve të afërm nuk duhet të pengojnë bashkëpunimin dhe miqësinë. Ato nuk duhet të minojnë një nga projektet më frymëzuese në histori, integrimin evropian, veçanërisht në fazën e tij të ardhshme për partnerët e EJL-së”, theksoi Presidenti Pendarovski, duke shtuar se integrimi i Ballkanit Perëndimor është në interes politik, ekonomik dhe të sigurisë të BE-së, kurse përfaqëson edhe investim gjeostrategjik për BE-në stabile dhe me prosperitet.
Në fjalimin e vet Presidenti theksoi se Maqedonia e Veriut dëshmoi guxim dhe mençuri në zgjidhjen e çështjeve të vështira bilaterale, duke iu referuar Marrëveshjes së Prespës me Greqinë dhe Marrëveshjes së miqësisë me Bullgarinë në drejtim të ndërtimit të marrëdhënieve të mira fqinjësore dhe tejkalimin e dallimeve nëpërmjet dialogut dhe mirëkuptimit.
