Presidentja Gordana Siljanovska Davkova nga sot gjendet në vizitë pune në Republikën e Kazakistanit, ku nesër, të mërkurën, më 28 maj, do të takohet me Presidentin Kasim Zhomart Tokajev dhe do të marrë pjesë në Forumin Ndërkombëtar Astana 2025.
Të enjten, më 29 maj, Presidentja Siljanovska Davkova do të mbajë fjalim në sesionin plenar të Forumit Ndërkombëtar “Astana 2025”, të cilin do ta hapë Presidenti i Republikës së Kazakistanit, Kasim Zhomart Tokajev. Fjalime do të mbajnë edhe Presidenti i Republikës së Ruandës, Poll Kagame; Kryeministri dhe ministri i Punëve të Jashtme të Shtetit të Katarit, sheiku Mohamed bin Abdulrahman bin Xhasim al Tani; Kryeministri i Republikës së Kroacisë, Andrej Plenkoviq; Sekretari i Përgjithshëm i Organizatës së Bashkëpunimit dhe Zhvillimit Ekonomik, Matijas Korman, si dhe ish-Sekretari i Përgjithshëm i Kombeve të Bashkuara dhe Presidenti aktual i Asamblesë dhe Kryetari i Këshillit të Institutit Global të Rritjes së Gjelbër, Ban Ki Mun.
Forumi, që do të mbahet më datë 29 dhe 30 maj me temë “Lidhja e Mendjeve, Krijimi i së Ardhmes”, pozicionohet si iniciativë e rëndësishme për avancimin e multilateralizmit dhe veprimin e përbashkët në zgjidhjen e çështjeve globale. Ndër temat kryesore janë përfshirë sfidat gjeopolitike, klima dhe ndryshimet ekonomike në nivel global.
