Presidentja Gordana Siljanovska Davkova e mirëpriti në takim lamtumire sheikun Jasim Bin Hamad All-Tani, ushtrues i detyrës në Ambasadën e Katarit në Shkup, duke e falënderuar për profesionalizmin dhe raportin e përkushtuar në zbatimin e funksionit diplomatik.
Në këtë takim, krahas konstatimit të marrëdhënieve të suksesshme miqësore politike, ajo vuri në dukje mundësinë e zgjerimit të bashkëpunimit në fushën e arsimit, shkencës, kulturës, shëndetësisë, bujqësisë, turizmit, energjetikës dhe ndërtimit, thellimin e marrëdhënieve ekonomike dhe rritjen e tregtisë ndërshtetërore.
Siljanovska-Davkova shprehu, gjithashtu, interesim për t’iu bashkuar projektit për eksportin e gazit natyror nga Katari në Shqipëri dhe Kroaci, duke pasur parasysh faktin se gjendemi në këtë rrugë.
Ajo e theksoi rolin kyç të Katarit në stabilizimin e rajonit të trazuar, duke u afirmuar si një aktor dhe faktor i dëshmuar i paqes. Të dy manifestuan besim të fortë në fuqinë e zgjidhjes paqësore të mosmarrëveshjeve, mungesën e alternativës ndaj paqes dhe nevojën për paqe të qëndrueshme si kusht për zhvillim.
Sheiku Jasim Bin Hamad All-Tani, nga përvoja e tij personale diplomatike në vend, theksoi bashkëpunimin e shkëlqyer me disa ministri: Ministrinë e Mbrojtjes, Ministrinë e Punëve të Brendshme, Ministrinë e Punëve të Jashtme dhe Tregtisë së Jashtme dhe Ministrinë e Ekonomisë.
Bashkëbiseduesit ranë dakord se emërimi i ambasadorëve në të dy vendet, në prag të 30-vjetorit të vendosjes së marrëdhënieve diplomatike vitin e ardhshëm, do të hapë një fazë të re bashkëpunimi, shumë më të mirë se ajo e deritanishmja.
