Presidentja Gordana Siljanovska Davkova, në kuadër të pjesëmarrjes në Samitin për Paqe në Ukrainë, që po mbahet në Zvicër, sot është takuar me Presidentin e Republikës së Polonisë, Andrzej Duda.
Në takim u shkëmbyen mendime për marrëdhëniet bilaterale, situatat në rajon, integrimin evropian dhe sfidat e sigurisë globale, si dhe bashkëpunimin e dy vendeve si aleate në NATO.
Bashkëbiseduesit shprehën kënaqësinë për bashkëpunimin e shkëlqyer të krijuar mbi miqësinë tradicionale dhe u shprehën se të dy vendet ndajnë një marrëdhënie të krijuar gjatë tre dekadave të bashkëpunimit, respektit reciprok, besimit dhe mirëkuptimit. U theksua se këtë vit po festojmë 30 vjet nga vendosja e marrëdhënieve diplomatike, që është dëshmi e partneritetit të përhershëm dhe vlerave të përbashkëta.
Presidentja përshëndeti mbështetjen e qartë të Polonisë në rrugën e gjatë të Maqedonisë drejt BE-së.
Presidentja Siljanovska Davkova theksoi rëndësinë e mbështetjes së vazhdueshme dhe të hapur të Polonisë në rrugën e Maqedonisë për integrime evropiane dhe falënderoi për mbështetjen e deritanishme, duke theksuar se përvojat polake do të jenë të dobishme për ne në procesin e anëtarësimit në BE. Ajo theksoi se jemi të përkushtuar pa mëdyshje në agjendën e integrimit në BE dhe në këtë kontekst shprehu pritjen e mbështetjes së fuqishme nga partnerët ndërkombëtarë dhe institucionet e BE-së për të siguruar që procesi ynë i anëtarësimit të vazhdojë pa pengesa.
