Presidenti Pendarovski sot u takua me kryetarin e Gjykatës Evropiane për të Drejtat e Njeriut, Robert Spano i cili po qëndron në Republikën e Maqedonisë së Veriut.
Në këtë takim, bashkëfolësit biseduan mbi proceset aktuale reformuese në gjyqësor dhe mbi bashkëpunimin e shtetit me Gjyqësorin.
Presidenti Pendarovski shprehu kënaqësinë nga bashkëpunimi midis institucioneve gjyqësore në Maqedoninë e Veriut me Gjykatën Evropiane për të Drejtat e Njeriut. Në këtë drejtim, Presidenti Pendarovski theksoi se shteti ynë e ka nënshkruar Protokollin 16 të Konventës Evropiane për të Drejtat e Njeriut i cili, pas ratifikimit në Kuvend, do të mundësojë bashkëpunim të drejtpërdrejtë midis gjykatave më të larta në Maqedoninë e Veriut dhe Gjykatës Evropiane për të Drejtat e Njeriut.
Presidenti Pendarovski theksoi se Komisioni Evropian në raportin e fundit mbi përparimin e Maqedonisë së Veriut e vlerësoi pozitivisht përparimin e vendit tonë në reformat në gjyqësor dhe përparimin në miratimin e strategjive për reformat të cilat do ta përforcojnë pavarësinë e gjykatës.
Në këtë takim Presidenti Pendarovski nënvizoi se Maqedonia e Veriut mbetet e përkushtuar në zbatimin përkatës të Konventës Evropiane për të Drejtat e Njeriut dhe Liritë Themelore dhe sidomos për zbatimin në kohë të vendimeve të Gjykatës Evropiane për të Drejtat e Njeriut.