Presidenti Stevo Pendarovski sot e mirëpriti ministrin e Punëve të Jashtme të Portugalisë, Augusto Santosh Silva.
Në këtë takim u bisedua mbi mundësitë për përparim të Maqedonisë së Veriut në eurointegrimet, në prag të mbajtjes së Këshillit të Bashkimit Evropian, muajin e ardhshëm. Bashkëfolësit shkëmbyen informacione dhe mendime mbi çështjet bilaterale lidhur me marrëdhëniet e fqinjësisë së mirë, në kontekst të tejkalimit të problemeve me Bullgarinë.
Në takim u theksua rëndësia e mbajtjes së konferencës ndërqeveritare së shpejti si dhe e fillimit formal të negociatave të pranimit për anëtarësim të Maqedonisë së Veriut në Bashkimin Evropian.
Presidenti shprehu falënderim për ministrin Silva për përpjekjet e presidencës portugeze e cila, përkrah numrit të shumtë të temave të rëndësishme, e mban fokusin dhe debatin për zgjerimin e Bashkimit Evropian.