Presidenti Stevo Pendarovski, në suazat e pjesëmarrjes në Forumin global të sigurisë “GLOBSEK 2020”, sot në Bratislavë kishte takim me Mirosllav Llajçak, përfaqësuesin e posaçëm të Bashkimit Evropian për dialogun Beograd-Prishtinë dhe çështje të tjera të Ballkanit Perëndimor.
Të dy bashkëbiseduesit shkëmbyen mendime dhe informacione për zhvillimin më të ri të ngjarjeve në rajon, sfidat me të cilat po ballafaqohet rajoni, sidomos në aspektin e stabilitetit rajonal, si dhe mbi rëndësinë e bashkëpunimit rajonal dhe rëndësinë e procesit të zgjerimit të Bashkimit Evropian.
Në atë drejtim, Presidenti Pendarovski e informoi përfaqësuesin e posaçëm Llajçak se Maqedonia e Veriut është e gatshme t’i fillojë negociatat aderuese me BE-në për të cilat pritet fillim formal gjatë presidencës gjermane.
Përfaqësuesi i posaçëm Llajçak e përmendi Maqedoninë e Veriut si një shembull jashtëzakonisht pozitiv në rajon duke e theksuar përparimin e rëndësishëm që është arritur në vitet e kaluara.
Presidenti Pendarovski e informoi përfaqësuesin e lartë Llajçak mbi gjendjet aktuale në vend dhe shprehu kënaqësinë për komunikimin e tyre të rregullt dhe për shkëmbimin e informacioneve të interesit të përbashkët.
