Presidenti Stevo Pendarovski, sot, në Vilën Vodno i priti përfaqësuesit e Sindikatës së Pavarur të Gazetarëve dhe Punonjësve në Media (SPGPM).
Në këtë takim u bisedua mbi gjendjen me liritë e mediave në Maqedoninë e Veriut, organizimin sindikal, si dhe kushtet në të cilat punojnë gazetarët dhe punonjësit në media.
U diskutua mbi çështje të cilat nevojiten të rregullohen në raport me të drejtat e punës për gazetarët dhe punonjësit e mediave, si dhe mbi mundësimin e kushteve përkatëse që gazetarët ta kryejnë lirisht punën e vet, duke pasur parasysh se të drejtat e mediave mbeten akoma sfidë për të cilën nevojitet të angazhohen të gjitha palët e prekura me qëllim që të gjenden zgjidhje afatgjate.
Përfaqësuesit e SPGPM-së e informuan Presidentin Pendarovski me iniciativën për të cilën po punojnë me organizatat e tjera relevante të mediave për ndryshim të dispozitave të Kodit Penal, me qëllim që sulmet mbi gazetarët dhe punonjësit e mediave të hetohen me detyrë zyrtare.
Presidenti Pendarovski dha mbështetje për ndryshimet në Kodin Penal me të cilat do të mundësohet që sulmet mbi gazetarët dhe punonjësit e mediave të trajtohen si vepra penale të cilat do të hetohen me detyrë zyrtare.
Gjithashtu, në këtë takim u bisedua edhe mbi punën e gazetarëve dhe punonjësve në media në kushte të kovid-19, ku u theksua rëndësia e mediave për informim në kohë në kohë pandemie dhe katastrofash. Mandej u theksua se të gjitha institucionet, organizatat dhe kompanitë të cilat i ftojnë mediat në evenimentet e veta është e nevojshme t’i respektojnë masat dhe rekomandimet për mbrojtje nga kovid-19 dhe të sigurohen kushtet përkatëse që mediat ta kryejnë punën e vet.
