Претседателот Стево Пендаровски денеска во проштална средба го прими амбасадорот на Државата Израел, Дан Орјан. Претседателот Пендаровски изрази благодарност за посветеноста и ангажманот на амбасадорот Орјан за време на извршувањето на одговорната дипломатска функција во нашата држава, посакувајќи му успех во неговите идни ангажмани.
На средбата соговорниците констатираа дека Северна Македонија и Израел негуваат блиски пријателски односи коишто се засновани на меѓусебна доверба и почит. Претседателот Пендаровски се заблагодари за израелската поддршка од стекнувањето на нашата независност до денес и притоа нагласи дека постојат можности за интензивирање на економската соработка во областа на безбедноста, науката и новите технологии, земјоделството, како и во културата и туризмот.
На средбата стана збор и за моменталните состојби во двете држави со пандемијата на Ковид-19, за процесите за вакцинација на граѓаните при што се разменија мислења и информации за последиците од пандемијата.
