Претседателот Стево Пендаровски денеска се обрати на панел дебатата „Општествените промени по Украина“ која се одржа на Филозофскиот факултет, Универзитет „Св. Кирил и Методиј“ во Скопје.
Претседателот Пендаровски го поздрави организирањето на оваа дебата и се осврна на повеќе аспекти на руската инвазија врз Украина и за последиците врз македонското општество, нашиот регион и во евро-атлантскиот простор.
Претседателот говореше за безбедносните закани и предизвици на територијата на земјите-членки на НАТО Алијансата, импликациите на војната во Украина врз безбедноста и одбраната, влијанијата врз социо-демографските промени и економската безбедност, како и последиците врз психологијата на комуникациите, особено кај дигиталните медиуми и социјалните мрежи.
На воведната сесија на дебатата „Општествените промени по Украина“ која е прва панел дискусија од серијата на дебати „Академски видик“, покрај претседателот Пендаровски учествуваа и украинската амбасадорка Наталија Задорожњук и деканот на Филозофскиот факултет, Ратко Дуев, додека настанот го модерираше професорот Марјан Ѓуровски.
