Претседателката Гордана Сиљановска-Давкова оствари средба со Едмонд Сотир, актер, основач и организатор на фестивалот „Македонско Културно лето“, којшто годинава по 20-ти пат ќе се одржи во Преспа, општина Пустец во Албанија.
Честитајќи го дведеценискиот јубилеј, Сиљановска-Давкова истакна дека фестивалот е исклучително важен, не само за Македонците коишто живеат во Албанија, туку и за сите Македонци каде и да се. Со него, како што рече таа, и покрај сите предизвици на македонското малцинство во Албанија, се негува македонската традиција, култура и идентитет, надвор од границите на државата.
На средбата, Сотир ја запозна претседателката со досега утврдената програма и истакна дека овогодинешното издание на фестивалот „Македонско Културно лето“ ќе се отвори на први јули со учество на маестралниот музичар и професор Драган Даутовски.
Соговорниците разговараа и за финансиските предизвици со коишто се соочува фестивалот, како и за неконзистентноста и дисконтинуитетот на поддршката од македонските и од албанските државни институции.
Изразувајќи подготвеност за поддршка, Сиљановска-Давкова рече дека, ќе најде модул за оддавање признание на фестивалот за посебен придонес во промоцијата на македонската култура во странство.
