Претседателот Стево Пендаровски денеска присуствуваше на одбележувањето на 25-годишнината од отворањето на Делегацијата на Европската Унија во Скопје.
Честитајќи ја годишнината, претседателот Пендаровски изрази задоволство од досегашниот развој на односите меѓу Република Северна Македонија и Европската Унија и оцени дека во изминатиот четврт век делегацијата е доверлив партнер во севкупниот развој на државата.
Претседателот Пендаровски истакна дека државата останува посветена на започнатиот преговарачки процес, како и на спроведувањето на сите неопходни реформи потребни за исполнување на условите за членство во Европската Унија, истакнувајќи го неговото уверување дека сонот за обединета Европа нема да биде целосен без интегрирањето на државите, како Република Северна Македонија, кои се и географски и вредносно дел од нашиот заеднички континент.
