Претседателот Стево Пендаровски, денеска, oствари разговор преку видео-врска со Карменца Харамиљо Гутиерез, новоименувана амбасадорка на Република Колумбија за Република Северна Македонија, со седиште во Будимпешта, по повод предавањето на акредитивните писма, кои поради пандемијата на Ковид-19, ги достави по писмен пат.
Упатувајќи честитки за назначувањето на функцијата, претседателот Пендаровски изрази увереност дека ангажманот на новоименуваната колумбиска амбасадорка ќе даде значаен придонес за јакнење на билатералната соработка меѓу двете држави која е на задоволително ниво, но со потенцијал за развој во областите од заеднички интерес.
Претседателот ја истакна добрата соработка меѓу двете земји на мултилатерално ниво и подвлече дека во следниот период е потребно да се регулира билатералната правна рамка, особено во областа на економијата, која ќе биде од корист за двете држави, а во насока на јакнење на целокупната економска соработка.
Двајцата соговорници разменија мислења за актуелната состојба со Ковид-19, како и за преземените мерки за справување со пандемијата во двете држави.
Претседателот Пендаровски нагласи дека амбасадорката на Колумбија ќе има целосна поддршка, посакувајќи и успех во извршувањето на одговорната должност.
