Претседателот Пендаровски се обрати на регионалната Конференција за медиумска писменост ЕУ-Западен Балкан: Справување со дезинформации

27 септември 2021 | Обраќања

Претседателот Стево Пендаровски денеска се обрати на регионалната Конференција за медиумска писменост ЕУ-Западен Балкан: Справување со дезинформации, во организација на Делегацијата на Европската Унија во Република Северна Македонија и Македонскиот институт за медиуми.

Во обраќањето претседателот Пендаровски порача дека константно треба да се работи на подигнување на нивото на медиумска писменост кај јавноста, за граѓаните да можат полесно да ги разликуваат вистината и фактите од манипулациите. На тој начин, како што истакна претседателот Пендаровски, ќе помогнеме во развивањето на институционален и личен имунитет кон опасниот вирус на дезинформациите и пропагандите.

Во продолжение е интегралниот текст од обраќањето на претседателот Пендаровски.

Почитувани претставници на граѓанскиот сектор,
Почитувани претставници на медиумите,
Ценети екселенции и гости,

Благодарам за поканата да се обратам на оваа конференција посветена на медиумската писменост, тема која од ден на ден се повеќе е присутна во јавните дебати и тема која е исклучително релевантна за граѓаните, но и за демократските процеси во целина.

Симболично е што конференцијата се одржува на датумот кој се смета за официјален роденден на Гугл – најкористениот интернет пребарувач. Одамна живееме во дигитална епоха, каде што социјалните медиуми масовно се користат за комуникација со различни публики, а, интернетот стана основна алатка и за учење, и за забава и за работа. Дигитализацијата овозможува далеку поголема достапност до информациите, со неверојатна брзина и во реално време. Со еден клик ги добиваме  најновите вести и информации за секоја тема, од секој дел на светот. Социјалните мрежи и интернет порталите полека, но, сигурно стануваат доминатен извор на информации за граѓаните и корпорациите.

Меѓутоа, можноста за брзо информирање со себе носи и потенцијално голем ризик. Како консументи на огромен број информации што брзо пристигнуваат, најчесто немаме ниту време, ниту можност да процениме дали содржината што ја читаме е проверена и точна. Или, пак што често се случува, е дезинформација која свесно или несвесно, ја информира погрешно јавноста и му штети на јавниот интерес.

Досегашното искуство и истражувања на темата покажуваат дека дезинформациите најчесто не се спонтани. Тие, имено, се производ на планиран пристап кон одредена тема. Намерата е системски да се манипулира јавноста со пласирање на погрешни информации, а, со крајна цел, да послужи на интересите на одредени политички или бизнис центри на моќ. На тој начин, интернетот, како алатка која секојдневно ја употребуваат милијарди луѓе, многу лесно може од платформа за информирање да стане платформа за дезинформирање.

Почитувани,

Кампањите за дезинформирање ја поларизираат јавната дебата, негативно влијаат врз политичките процеси, ја нарушуваат довербата на граѓаните во институциите и ја еродираат општествената кохезија. Поради нивниот потенцијал да ги поткопуваат демократските вредности, дезинформациите можат да ја дестабилизираат и самата држава. Токму затоа, многу држави во светот ги препознаваат и ги третираат дезинформациите како една од приоритетните закани за нивната национална безбедност. Во неодамнешниот стратешки извештај за сопствениот капацитет во оваа област и Европската Унија констатира дека кампањите за дезинформирање се една од главните форми на притисок врз демократските модели на владеење.

Пандемијата на Ковид-19 сосема конкретно ни покажа колкава штета може да предизвикаат дезинформациите. Не само кај нас, туку и во целиот свет, таканаречената инфодемија ја намалува ефективноста на политиките и мерките за справување со пандемијата, го зголемува колебањето на луѓето да се вакцинираат и конечно, ја заострува јавната дебата по ова прашање. Со поткопување на довербата во медицинската наука и професија и генерално, во здравствените системи и институции, инфодемијата стана закана и за јавното здравје и за животите на луѓето.

Почитувани,

Пред нас е комплексна задача, преку холистички пристап да изградиме системска, медиумска, но, пред се, лична отпорност кон дезинформациите. Тоа можеме да го постигнеме само преку блиска соработка на државните институции, политичките партии, бизнис заедницата, граѓанскиот сектор и медиумите.

Процесот на едуцирање за медиумската писменост и дезинформациите во нашите основни и средни училишта, ќе овозможи да создаваме генерации на ученици кои ќе можат полесно да ги препознаваат дезинформациите и да ги формулираат своите ставови врз основа на релевантни и проверени информации.

Потребно е да обезбедиме подобри услови за професионално  и независно работење во медиумите и справување со дезинформациите. Тоа подразбира и доследна имлементација на постојната регулатива и нејзино подобрување на линија на европските стандарди во оваа сфера. Исто така, потребно е да ги поддржиме саморегулаторните механизми во медиумската сфера, како и платформите за проверка на фактите.

Треба константно да се работи на подигнување на нивото на медиумска писменост кај јавноста, за граѓаните да можат полесно да ги разликуваат вистината и фактите од манипулациите. Така ќе помогнеме во развивањето на институционален и личен имунитет кон опасниот вирус на дезинформациите и пропагандите.

Притоа, треба да бидеме свесни дека нашата борба против дезинформациите мора да се води паралелно со борбата за вистински медиумски слободи и слободата на говорот како фундаментално човеково право и врвно цивилизациско достигнување. Борејќи се против лагата, истовремено треба да се бориме за вистината која е предуслов за прогрес на секое слободно и праведно општество.

Ви благодарам.

 

Категории

Categories

Kategori

Последни вести

Latest news

Lajmet e fundit

Дискусија „Влијание и вклучување на гласачи: како до успешни политички кампањи?“ во организација на ПЦПО и ИРИ

Дискусија „Влијание и вклучување на гласачи: како до успешни политички кампањи?“ во организација на ПЦПО и ИРИ

Во Кабинетот на претседателот на Република Северна Македонија се одржа дискусија на тема „Влијание и вклучување на гласачи: како до успешни политички кампањи? - лекции од Соединетите Американски Држави“, во организација на Претседателскиот центар за политичко...

Претседателот Пендаровски се обрати на дискусијата „Заедничка иницијатива за климатска акција“ во пресрет на 28. Самит за климатски промени

Претседателот Пендаровски се обрати на дискусијата „Заедничка иницијатива за климатска акција“ во пресрет на 28. Самит за климатски промени

Претседателот Стево Пендаровски денеска се обрати на дискусијата „Заедничка иницијатива за климатска акција “, којашто се одржа во соработка со постојаниот претставник на Програмата за развој на Обединетите нации (УНДП) Армен Григорјан, а во пресрет на претстојниот...

Претседателот Пендаровски го додели признанието „Успешни млади“ за 2022 година

Претседателот Пендаровски го додели признанието „Успешни млади“ за 2022 година

Претседателот Стево Пендаровски, на церемонија во Кабинетот на претседателот, денеска го додели признанието „Успешни млади“ за 2022 година. Признанието се доделува како поттик на научноистражувачката мисла и уметничката работа на младите во нашата држава. За Најдобра...

Панел – дискусија „Вклучи се, превенирај, одговори и систематизирај“ во рамки на 16 дена активизам против родово-базирано насилство

Панел – дискусија „Вклучи се, превенирај, одговори и систематизирај“ во рамки на 16 дена активизам против родово-базирано насилство

Под покровителство на сопругата на претседателот, Елизабета Ѓоргиевска и во соработка со Сојуз-Национален совет за родова рамноправност, денеска се одржа панел-дискусија на тема „Вклучи се, превенирај, одговори и систематизирај“,  по повод кампањата „16 дена активизам...

Претседателот Пендаровски присуствуваше на настанот „Ацо Шопов – Невообичаено“

Претседателот Пендаровски присуствуваше на настанот „Ацо Шопов – Невообичаено“

Претседателот Стево Пендаровски присуствуваше на настанот „Ацо Шопов – Невообичаено“ којшто се одржа во рамки на чествувањето на 100-годишнината од раѓањето на македонскиот поет Ацо Шопов, иницијатива под покровителство на Претседателот. [gallery...