Претседателот Стево Пендаровски денеска ја посети црквата „Св. Ѓорѓија“ во с.Курбиново кадешто се одвива првата фаза од проектот за конзервација и реставрација на ѕидното сликарство во ентериерот на црквата којашто е ставена под заштита како културно-историски споменик.
Претседателот Пендаровски се запозна со тековните активности за конзервација и реставрација на ѕидното сликарство во црквата при што, во разговорот со мешовитиот конзерваторски тим од земјава и од Грција, претседателот беше информиран дека во месец мај започнала реализацијата на непосредната заштита од нивна страна со што завршило обезбедувањето на живописот, се направиле проби за малтерисување на ѕидните површини со отпаднато ѕидно сликарство, а бил започнат и процесот на инјектирање и консолидација на малтерните подлоги за носачот на ѕидното сликарство.
Поздравувајќи ги активностите за конзервација и реализација на ѕидното сликарство во црквата „Св.Ѓорѓија“ позната по најстарото сочувано ѕидно сликарство кое претставува несекојдневен пример на византиската уметност од крајот на 12. век, претседателот Пендаровски истакна дека реализирањето на овој проект е значаен за заштитата на културното наследство на нашата земја.
Проектот за конзервација и реставрација на ѕидното сликарство на оваа црква се реализира како повеќегодишен проект на Министерството за култура на Република Северна Македонија. Учество во реализацијата на проектот има мешовит стручен тим од земјава и од Грција за што е потпишан Меморандум за соработка со Европскиот центар за византиски и поствизантиски споменици од Солун, Република Грција. Носител на проектот е НУ Завод за заштита на спомениците на културата и музеј – Битола.
