Претседателот Стево Пендаровски денеска го прими Филип Донкел, нерезидентен амбасадор на Големото Војводство Луксембург во Република Северна Македонија. На средбата се контатираше дека двете држави негуваат пријателски и партнерски односи и беше нагласена заемната определба за нивно унапредување и интензивирање во политичката, економската и културната сфера.
Соговорниците разменија мислења за македонските евроинтеграции, при што претседателот Пендаровски се заблагодари за гласната и принципиелна поддршка од Големото Војводство Луксембург за европската интеграција на Северна Македонија и на земјите од Западен Балкан.
Пендаровски посочи дека принципиелноста и посветеноста на Луксембург за пробивот на Северна Македонија на европскиот пат е навистина за почит. Тој ги поздрави напорите на Луксембург за почеток на повеќе од заслужените пристапни преговори со Унијата.
Претседателот Пендаровски и амбасадорот Донкел разговараа и за руската воена агресија врз Украина, во контекст на нејзиното влијание врз безбедносната состојба во Европа.