Под покровителство на претседателот Стево Пендаровски вчеравечер во Музејот на современата уметност беше отворена изложбата на дела на доајенот на црногорската и југословенската современа уметност на дваесетиот век, Петар Лубарда.
На изложбата за првпат е претставена целата збирка уметнички дела која Лубарда ја подари на Скопје, во знак на сочувство и солидарност по катастрофалниот земјотрес во Скопје во 1963 -тата година, со што е меѓу првите најголеми дарители на Музејот на современа уметност.
Колекцијата на Лубарда изложена во Музејот брои вкупно 52 дела, помеѓу кои 40 слики во техника масло на платно и лесонит, два акварели и десет цртежи кои опфаќаат две и пол децении од неговата уметничка кариера. Покрај делата, изложени се и архивски материјали кои се однесуваат на неговите изложби и донации.
Изложбата е во организација на Министерството за култура на Република Северна Македонија, Министерството за култура и медиуми на Црна Гора, амбасадата на Црна Гора и Музејот на современа уметност.
