Претседателот Стево Пендаровски ги прими акредитивните писма на новоименуваниот амбасадор на Република Молдавија во Република Северна Македонија, Анатол Чебу, со седиште во Софија.
На церемонијата на предавање на акредитивните писма претседателот Пендаровски ги нагласи пријателските односи меѓу двете земји кои се карактеризираат со заемни заложби за нивно збогатување во сите области од заемен интерес додавајќи дека ја цениме заложбата и интересот за соработка во делот на евроинтегративните процеси и остварување на европските аспирации за полноправно членство во Европската Унија, како стратешки приоритети на нашите земји.
„Нашите очекувања се насочени кон одржување на првата Меѓувладина конференција што ќе го означи и официјалниот почеток на пристапните преговори на Република Северна Македонија со Европската Унија, со што ќе имаме можност да ја потврдиме нашата подготвеност за придвижување кон европската интеграција“, рече претседателот Пендаровски.
Претседателот Пендаровски истакна дека Северна Македонија ќе биде активно вклучена во работата на тројката која претседава со Организацијата за безбедност и соработка на Европа, а веќе во 2023 година го презема претседавањето со оваа престижна организација, за што очекуваме плодна и интензивна соработка со сите пријателски земји во наредниот период.
Молдавскиот амбасадор истакна дека двете земји имаат одлични политички односи, што е потврдено не само со билатералните политички дискусии, туку и со конкретни факти додавајќи дека Молдавија е особено заинтересирана за македонското искуство во развивање на економските односи, привлекување инвестиции и промовирање на извозот.
„Во оваа област ќе ја забележам отвореноста и желбата на властите во Кишињев да ја развијат билатералната правна рамка, особено економската димензија, како што се договорите за меѓусебна промоција и заштита на инвестициите и економска соработка“, рече амбасадорот Чебук.
Претседателот Пендаровски на новоименуваниот амбасадор на Република Молдавија, Анатол Чебук, му посака успех во извршувањето на одговорната дипломатска функција.
