Под покровителство на претседателот на Република Северна Македонија, Стево Пендаровски, Амбасадата на Народна Република Кина во земјава обезбедува финансиски средства со цел реализација на конзерваторско – реставраторски работи на спомен куќата на Ѓорѓија Пулевски во Галичник, како заштитено културно добро.
Меморандумот за соработка денеска го потпишаа генералниот секретар на Кабинетот на претседателот Миле Бошњаковски, кинескиот амбасадор Џанг Ѕуо и директорот на Националниот Конзерваторски Центар, Мемет Селмани. Согласно меморандумот ќе бидат обезбедни 1 474 000 денари, донација на Националниот Конзерваторски Центар – Скопје, со цел преземање на дејствија и активности во насока на конзервација и реставрација на спомен куќата на македонскиот национален преродбеник Ѓорѓија Пулевски.
Донацијата од кинеската Амбасада претставува потврда на интересот за зајакнување на меѓусебната соработка, преку директна поддршка за зачувување и заштита на културното наследство во Република Северна Македонија.
Родната куќа на Ѓорѓија Пулевски во Галичник, во 1956 е претворена во „Меморијален музеј на Ѓорѓија Пулевски“ и е дел од објектите кои се прогласени за културно наследство на земјава.