Кабинетот на претседателот на Република Северна Македонија и Комисијата за спречување и заштита од дискриминација, денеска потпишаа Меморандум за соработка, со цел преземање на координирани активности во насока на промоција на заштитата, и обезбедување на целосно и еднакво уживање на човековите права и основни слободи за сите граѓани во Република Северна Македонија.
Меморандумот беше потпишан од страна на генералниот секретар на Кабинетот на претседателот, Миле Бошњаковски и претседателот на Комисијата за спречување и заштита од дискриминација, Кире Василев.
Согласно меморандумот, двете институции се согласуваат заеднички да соработуваат во однос на промотивни активности и кампањи за спречување и заштита од дискриминација, поддршка при организирање на меѓународни конференции и настани од полето на заштита од дискриминација, соработка и учество во активности и обуки во организација на Претседателскиот центар за политичко образование, како и размена на стручни мислења во областа на предлозите и претставките поврзани со заштитата од дискриминација.
Со овој Меморандум се потврдува интересот за јакнење на меѓусебната соработка во поддршка на активностите за спречување и заштита од дискриминација на граѓаните во Република Северна Македонија.
