Претседателот Стево Пендаровски и претседателката на Унгарија, Каталин Новак, којашто престојува во официјална посета на Република Северна Македонија, ја посетија канцеларијата на Претседателот МладиХаб, каде остварија средба со претставници на Здружението на студенти по медицина и на Националниот младински совет на Македонија.
Од Здружението на студенти по медицина ги презентираа нивните тековни активности и иницијативата ХелтХаб чија цел е унапредување на здравјето, здравствената заштита и заштита на животната средина, како и нивните иновативни решенија за решавање на здравствените проблеми на населението и зацврстување на позицијата на младите лекари и студентите во општеството.
На средбата со двајцата претседатели, претставниците на младинскиот совет ги споделија своите ставови за улогата на младите во земјата, образовните перспективи, за предизвиците со кои се соочуваат, како и нивните размислувања и идеи за поголемо младинско учество во креирање на јавните политики. Воедно, младинските здруженија ја посочија успешната соработка и поддршката што ја добиваат од Кабинетот на Претседателот.
