На покана на претседателот на Република Северна Македонија, Стево Пендаровски, на 12 и 13 август 2021 година во посета на нашата држава престојува Неговата Екселенција, шеикот Мухамед бин Абдулкарим Ал-Исса, генерален секретар на Муслиманската светска лига.
Во рамки на посетата, денеска претседателот Стево Пендаровски го прими шеикот Мухамед бин Абдулкарим Ал-Исса.
На средбата се разговараше за активностите на Муслиманската светска лига во насока на промовирање на исламската толеранција, дијалогот и соработка со сите конфесии, што води кон надминување на растечките предрасуди и обезбедување услови за мир и соживот. Во тој контекст, претседателот Пендаровски ги поздрави меѓународните активности на шеикот Мухамед бин Абдулкарим Ал-Исса оддавајќи признание за неговиот личен ангажман во промоцијата на умерените исламски вредности во светот.
Истовремено, претседателот Пендаровски оцени дека посетата е можност за воспоставување дијалог и соработка со Муслиманската светска лига подвлекувајќи дека нашата држава е со длабоко вкоренета традиција на меѓурелигиска толеранција, почитување на различните верски убедувања и негување на верските слободи.