Претседателот Пендаровски се обрати на Третата зимска школа на Меѓународниот семинар за македонски јазик, литература и култура

23 јануари 2023 | Соопштенија

Претседателот Стево Пендаровски преку видео-порака се обрати на свеченото отворање на Третата зимска школа на Меѓународниот семинар за македонски јазик, литература и култура при Универзитетот „Св. Кирил и Методиј“ во Скопје, што од денеска до 28 јануари се одржува виртуелно. Годинешното издание на зимската школа е во чест на македонскиот поет Ацо Шопов, по повод 100 годишнината од неговото раѓање.

Почитувани учесници на Третата зимска школа на Меѓународниот семинар за македонски јазик, литература и култура,
Драги пријатели,

Ви благодарам на можноста да ви се обратам на почетокот на Третата зимска школа на Меѓународниот семинар за македонски јазик, литература и култура при Универзитетот „Св. Кирил и Методиј“ во Скопје.

Ако на инаугуративното издание на зимската школа пред две години одбележувавме сто години од раѓањето на великанот на македонската филологија, лингвистика и книжевност, академик Блаже Конески, годинава повторно одбележуваме значаен јубилеј – 100 години од раѓањето на истакнатиот македонски поет Ацо Шопов, еден од основоположниците на современата македонска книжевност.

Како покровител и на овој јубилеј особено сум почестен што одбележувањето на оваа значајна годишнина е во соработка со УНЕСКО. Меѓу бројните активности во програмата за одбележување на јубилејот во текот на целата 2023 година, вклучително и настаните предвидени за Светскиот ден на поезијата, 21 март, во седиштето на УНЕСКО во Париз, особено место зазема и Третата зимска школа.

Дозволете да ја поздравам одлуката на Меѓународниот семинар, што во рамките на годинешнава зимска школа, наставата за семинаристите од напреднато рамниште, во целост ќе биде посветена на поезијата на Ацо Шопов. Верувам дека тоа ќе биде дополнителна мотивација и конкретна можност за ново приопштување на Шопов кон меѓународната читателска публика преку нови препеви и трудови за неговата поезија.

Без сомнение, богатството на македонскиот јазик најубаво може да се види и преку пишаниот збор и достигнувањата на нашите литературни автори како Шопов, кој преку својот поетски израз отвора нови перспективи за препеви кои, самите по себе, покрај одличното познавање на јазикот на кој се напишани, се одраз на голема посветеност и креативност. Уживањето во раскошот на неговите стихови, е најдобриот начин да ја почувстуваме убавината на македонскиот јазик и неговиот огромен потенцијал.

Почитувани,

Самиот факт што на зимската школа присуствуваат повеќе од 40 учесници од 17 земји од светот, сведочи за интересот за изучување на македонскиот јазик на што сите треба да бидеме особено горди.

Без дилеми, меѓу учесниците имаме нови афирматори на македонскиот јазик, на македонската литература и култура, но и пријатели на нашата земја и нејзините убавини. Во исто време, искажаниот интерес нѐ потсетува и на обврската што ја имаме да го негуваме македонскиот јазик и постојано да работиме на неговото зачувување и унапредување.

Наспроти фактот дека зимската школа се одржува преку интернет, се надевам дека голем дел од вас наскоро ќе можат и физички да дојдат во земјава и да го изучуваат македонскиот јазик, дали на летната школа на семинарот за македонски јазик, литература и култура, или во некој друг формат и прилика.

Би сакал во ова мое обраќање да изразам благодарност до предавачите и сите учесници на зимската школа за нивниот интерес за изучување на македонскиот јазик. Како наш идентитетски и духовен столб, односно, според Конески, „единствената наша комплетна татковина“, особено сме среќни што сѐ повеќе лингвисти, филолози, писатели и студенти покажуваат интерес за македонскиот јазик.

На крајот, да се послужам со зборови од насловот на една од збирките поезија на Ацо Шопов „Ветрот носи убаво време“ и да посакам школата да ви донесе само убаво време, убави моменти со плодни дискусии од кои ќе произлезат нови иницијативи за соработка, истражувања и развој.

Ви честитам на желбата и изборот да бидете дел од Третата зимска школа на Меѓународниот семинар за македонски јазик, литература и култура и во наредните шест дена, додека трае школата, ви посакувам успешна работа.

Ви благодарам на вниманието.

Категории

Categories

Kategori

Последни вести

Latest news

Lajmet e fundit

Претседателот Пендаровски се обрати на Светскиот самит за климатски активности во рамки на COP28

Претседателот Пендаровски се обрати на Светскиот самит за климатски активности во рамки на COP28

Претседателот Стево Пендаровски, во рамки на учеството на Конференцијата на Обединетите нации за климатски промени - COP28 која се одржува во Дубаи, Обединетите Арапски Емирати, денеска се обрати на Сегментот на високо ниво на Светскиот самит за климатски активности....

Средба на претседателот Пендаровски со претседателката на Европската банка за обнова и развој, Одил Рено-Басо во Дубаи

Средба на претседателот Пендаровски со претседателката на Европската банка за обнова и развој, Одил Рено-Басо во Дубаи

Претседателот Стево Пендаровски денеска во Дубаи, за време на неговото учество на Конференцијата на Обединетите нации за климатски промени - COP28, оствари средба со претседателката на Европската банка за обнова и развој, Одил Рено-Басо. ...

Средби на претседателот Пендаровски на маргините на Конференцијата на Обединетите нации за климатски промени – COP28 во Дубаи

Средби на претседателот Пендаровски на маргините на Конференцијата на Обединетите нации за климатски промени – COP28 во Дубаи

Претседателот Стево Пендаровски во рамки на учеството на Конференцијата на Обединетите нации за климатски промени – COP28 во Дубаи оствари кратки средби со британскиот крал Чарлс Трети, со кралот на Јордан Абдула Втори, со претседателката на Република Словенија Наташа...

Средба на генералниот секретар на Кабинетот на претседателот со заменик – министерот за надворешни работи на Јапонија

Средба на генералниот секретар на Кабинетот на претседателот со заменик – министерот за надворешни работи на Јапонија

Генералниот секретар на Кабинетот на претседателот Миле Бошњаковски, денеска прими делегација предводена од заменик – министерот за надворешни работи на Јапонија, Јоичи Фуказава, којашто престојува во земјава по повод учеството на Министерски совет на ОБСЕ. [gallery...

Претседателот Пендаровски присуствуваше на отворањето на Светскиот самит за климатски активности во рамки на COP28

Претседателот Пендаровски присуствуваше на отворањето на Светскиот самит за климатски активности во рамки на COP28

Претседателот Стево Пендаровски денеска во Дубаи, Обединетите Арапски Емирати, присуствуваше на отворањето на Светскиот самит за климатски активности, што се одржува во рамки на Конференцијата на Обединетите нации за климатски промени - COP28. [gallery...