Претседателот Стево Пендаровски денеска ги прими членовите на данскиот музички бенд „Ефтеркланг“, коишто во соработка со македонски музичари на 30 април заеднички ќе изведат концерт пред споменикот „Македониум“ во Крушево.
На средбата претседателот Пендаровски беше запознаен со музичкиот проект „Ефтеркланг македониум бенд“ и нивната инспирација за ова музичко остварување, како и со идејата за снимање на музички документарен филм од нивното патешествие во Северна Македонија и искуството со македонската музика.
Претседателот Пендаровски кој и самиот ќе биде учесник во музичкиот документарен филм, ја поздрави соработката помеѓу данските и македонските музичари, интересот на данскиот бенд за уметничко изразување во земјава и нејзино културолошко истражување, и им посака успешна изведба на претстојниот концерт во Крушево.
Домаќин на овој меѓународниот резиденцијален проект е Младински културен центар, а истиот е поддржан од Гете – институтот и Министерството за култура на Република Северна Македонија.
Од македонските музичари во проектот учествуваат младински хор на МКЦ, фолклористот Стефче Стојковски, музичарите Дејан Спасовиќ, Ива Дамјановски, Дина Јашари, Мартина Бараковска, Дино Милосављевиќ и Јане Трајковски.
