Во рамки НАТО Самитот во Мадрид, претседателот Стево Пендаровски денеска учествуваше на третата работна сесија на состанокот на Северноатлантскиот совет.
Сесијата на ниво на шефови на држави и влади, со која претседаваше генералниот секретар на НАТО, беше посветена на заканите и предизвиците кои произлегуваат од јужното соседство на НАТО Алијансата.
Во своето обраќање претседателот Пендаровски истакна дека како што е наведено во Стратегискиот концепт на НАТО се соочуваме со глобални и меѓусебно условени закани. Тероризмот, потенцираше претседателот, во сите негови форми и појави е најдиректната асиметрична закана за безбедноста на нашите народи, а особено го користат трети страни кои сакаат да го прошират нивното присуство и наметнат своето влијание преку хибридни закани и политички притисоци.
Во таа насока, претседателот истакна дека е потребно НАТО да продолжи со практичната поддршка и зајакнување на капацитетите на земјите-партнери, како и продлабочување на дијалогот со земјите-партнери на Алијансата, со меѓународните организации, ООН, ЕУ, и со другите релевантни регионални форуми и невладини организации.
Во дискусијата на состанокот, претседателот посочи дека ни е потребен широк консензус, со цел да развиваме функционална и предвидлива мултилатерална соработка, преку која ќе се овозможи мир и безбедност во 21 век.
