Претседателот Стево Пендаровски денеска го прими победничкиот тим од НАСА спејс апс челинџ Струмица (NASA Space App Challenge Strumica), придружен од организацискиот тим од Струмица, како и претставници на НАСА спејс апс Маунтајн Вју (NASA Space App Mountain View) и НАСА спејс апс Кливленд (NASA Space App Cleveland).
Претставниците од победничкиот тим, средношколците од СОУ „Св. Климент Охридски“ – Охрид, го информираа претседателот за проектот на којшто работеле „Светлината на ѕвездите“ (The Light of Stars).
Претседателот Пендаровски, поздравувајќи го подвигот на овој тим и честитајќи го успехот, порача да продолжат да учествуваат на вакви натпревари и им посака натамошни успеси на личен и професионален план.
Организаторите на НАСА Спејс апс челинџ Струмица истакнаа дека ваквиот натпревар е можност за поттикнување на учениците да истражуваат и да работат на иновативни решенија во област која ќе им овозможи стекнување на дополнителни знаења и вештини од оние кои ги стекнуваат низ формалното образование, да им отвори нови перспективи и можности за создавање на нови пријателства.
НАСА спејс апс челинџ со локација во Струмица се одржа под водство на Зорица Масникоса-Поп Трајкова на 1-2 октомври оваа година. На средбата беше истакнат и придонесот на општина Струмица, училиштето СОУУД ,,Димитар Влахов“ и неколку компании за овој настан да се реализира во најдобро светло, поддржувајќи ја неговата едукативна компонента.