Претседателот Стево Пендаровски денеска прими претставници на Националниот сојуз на глуви и наглуви на Република Северна Македонија и Фолклорното здружение на глуви и наглуви „Традиција фолклор“.
Претставниците на сојузот го запознаа претседателот Пендаровски со тековните активности на организацијата, којашто веќе 75 години ги застапува правата и интересите на глувите и наглуви лица во нашата држава, а во себе обединува околу 8.000 членови.
Претседателот Пендаровски ја истакна важноста на делувањето на сојузот во насока на остварување на потребите и правата на глувите и наглуви лица, заложбите за промовирање и подигнување на свеста за постоењето на оваа група на граѓани и нивно прифаќање во општеството и изрази поддршка за напорите за натамошно подобрување на нивната положба во сите сфери од живеењето.
На средбата претседателот Пендаровски беше запознаен и со активностите на фолклорното здружение на глуви и наглуви „Традиција фолклор“, формирано во 2019 година во рамки на Националниот сојуз на глуви и наглуви.
„Фолклорот е историско и културно наследство за глувите и наглуви во Република Северна Македонија“, порача претседателот Пендаровски на знаковен јазик.