Кабинетот на Претседателот на Република Северна Македонија, во рамки на активноста Отворен Кабинет, денеска го посетија ученици кои следат настава на албански јазик во ООУ „Живко Брајковски“ од Скопје.
Посетителите имаа можност да се запознаат со претседателот Пендаровски, да поразговараат за неговата работа и за активностите во Кабинетот. Го информираа претседателот за нивните впечатоци од вчерашниот прв училишен ден и за нивните очекувања и интереси во рамки на образовниот процес.
Претседателот Пендаровски им посака успешна учебна година, нагласувајќи ја важноста на одговорниот пристап во основното образование, и на негувањето на другарството со нивните соученици како важни предуслови за нивниот натамошен личен развој.
Учениците ги посетија и просториите во коишто се одржуваат официјалните и работните средби, како и салите наменети за свечености, состаноци, седници на Советот за безбедност и прес-конференции. Од вработените во Кабинетот беа информирани за историјатот на објектот во којшто е сместен Кабинетот на Претседателот, како и за начинот на функционирање на институцијата, а во Мозаик салата го разгледаа и импозантниот диптих „Македонија – светла земја“ и „Македонија памети“, дело на еден од нашите најзначајни современи уметници – академик Глигор Чемерски.
Отворен Кабинет како дел од проектот Лице в лице со Претседателот овозможува директни средби на граѓаните со претседателот Стево Пендаровски. Досега Кабинетот го посетиле граѓани од различни возрасти и занимања, студенти од земјава и од странство, како и ученици од основни и средни училишта од земјава.
