Кабинетот на претседателот на Република Северна Македонија, во рамки на активноста Отворен Кабинет денеска го посетија ученици од ССОУ „Коле Неделковски“ од Велес и од ООУ „Димитар Миладинов“ од Скопје.
Учениците се сретнаа со претседателот Пендаровски и разговараа за неговите надлежности, за обврските што произлегуваат од претседателската функција, како и за редовните активности. На средбата, тие ги споделија интересите во рамки на образовниот процес, во контекст на нивните идни професионални определби.
Посетителите ги разгледаа работните простории на Кабинетот во кои се реализираат официјалните и работните средби, како и Мозаик салата во која е поставен импозантниот диптих „Македонија – светла земја“ и „Македонија памети“ дело на еден од најзначајните македонски уметници академик Глигор Чемерски. Од вработените беа запознати со начинот на функционирање на институцијата.
Отворен Кабинет како дел од проектот Лице в лице со Претседателот овозможува директни средби на граѓаните со претседателот Стево Пендаровски. Во изминатиот период Кабинет го посетија граѓани од различни возрасти и занимања, студенти од земјава и од странство, како и ученици од основни и средни училишта.