Ученици од ООУ,,Вера Циривири – Трена“ и од ООУ „Киро Глигоров“ од Скопје, како и ученици од ООУ „Илинден“ од Крива Паланка, во рамки на активноста Отворен Кабинет, денеска го посетија Кабинетот на претседателот.
Посетителите имаа можност да се запознаат со претседателот Пендаровски, да се информираат за неговите редовни работни обврски и за теми поврзани со претседателската функција. Денешната посета беше можност претседателот Пендаровски да поразговара со нив за нивните омилени училишни предмети и лични афинитети, како и за важноста од инклузивноста и соработката меѓу учениците.
Учениците ги посетија и просториите во коишто се одржуваат официјалните и работните средби на претседателот Пендаровски, како и салите наменети за состаноци, свечености и прес-конференции.
Од вработените во Кабинетот се информираа со начинот на функционирање на институцијата, а во Мозаик салата го разгледаа и впечатливиот диптих „Македонија – светла земја“ и „Македонија – земјата памети“, дело на еден од нашите најзначајни современи уметници академик Глигор Чемерски.
Отворен Кабинет е дел од проектот Лице в лице со Претседателот со кој се овозможуваат директни средби на граѓаните со претседателот Стево Пендаровски. Во изминатите четири години Кабинет го посетија граѓани од различни возрасти и занимања, студенти од земјава и од странство, како и ученици од основни и средни училишта.
