Ученици од ООУ„Наум Наумовски Борче“, од ООУ „Свети Климент Охридски” од Скопје и деца од скопската градинка „13 Ноември“, денеска го посетија Кабинетот на претседателот Пендаровски во рамки на активноста Отворен Кабинет.
Посетителите се сретнаа и поразговараа со претседателот, а имаа и можност да присуствуваат во просториите во коишто се реализираат официјалните и работните средби, како и во салите во коишто се одржуваат состаноци, свечености, настани и прес-конференции. Во Мозаик салата го разгледаа импозантниот диптих „Македонија – светла земја“ и „Македонија – земјата памети“ на академик Глигор Чемерски.
За време на нивната денешна посета присуствуваа и на церемонијата за промена на државното знаме на платото пред Кабинетот, извршена од припадниците на Баталјонот за почести и опслужување на Армијата, што се одржува со цел подигнување на чувството и почитта кон знамето на Република Северна Македонија, како репрезент и симбол на нашата држава.
Отворен Кабинет како дел од проектот Лице в лице со Претседателот, во континуитет овозможува граѓани од различни возрасти, професии и занимања, студенти од земјава и од странство и ученици од основни и средни училишта да остварат посета на Кабинетот и да се сретнат со претседателот Пендаровски.
