Кабинетот на Претседателот на Република Северна Македонија, денеска го посетија ученици од СУГС „Сарај“, СУГС „Никола Карев“, ООУ „Ѓорѓија Пулевски“ од општина Аеродром, ООУ „Св. Климент Охридски“ од општина Кисела Вода и учесници од Интернационалниот фестивал на детски песни „Гроздоберче“ од Кавадарци во рамки на Отворен Кабинет.
Посетителите имаа можност да се сретнат и да поразговараат со претседателот Пендаровски за неговата работа и за активностите во Кабинетот, а присуствуваа и во просториите во коишто се реализираат официјалните и работните средби, како и во салите наменети за свечености, состаноци, седници на Советот за безбедност и прес-конференции.
Од вработените во Кабинетот беа информирани за историјатот на објектот во којшто е сместен Кабинетот на Претседателот, како и за начинот на функционирање институцијата, а во Мозаик салата го разгледаа и импозантниот диптих „Македонија – светла земја“ и „Македонија памети“, дело на еден од нашите најзначајни современи уметници – академик Глигор Чемерски.
Посетителите имаа можност да ја разгледаат и изложбата на ракотворби што по повод Деновите на занаетчиство се одржува на платото пред Кабинетот, во соработка со Центарот за управување со промени, а во рамки на проектот „Мерки за зајакнување на женски бизниси по Ковид-19“ поддржан од УСАИД и БТД.
Отворен Кабинет е дел од проектот Лице в лице со Претседателот, инициран за да се овозможи реализација на директни средби на граѓаните со претседателот Стево Пендаровски. Во рамки на активноста Кабинетот го посетуваат, граѓани од различни возрасти и области на занимања, организации, студенти од земјава и од странство, како и ученици од основни и средни училишта од земјава.