Кабинетот на Претседателот на Република Северна Македонија, во рамки на активноста Отворен Кабинет, денеска го посетија ученици од ООУ „Ѓорѓија Пулевски“, ООУ „Гоце Делчев“ и од ООУ „Браќа Миладиновци“ од Скопје.
Посетителите имаа можност да се сретнат и да поразговараат со претседателот Пендаровски, да присуствуваат во просториите во коишто се реализираат официјалните и работните средби, како и во салите во коишто се одржуваат состаноци, свечености, настани и прес-конференции, седници на Советот за безбедност, предавање на акредитивни писма од странски амбасадори.
Од вработените во Кабинетот учениците беа информирани за историјатот на објектот во којшто е сместен Кабинетот на Претседателот, како и за начинот на функционирање на оваа институција, а го разгледаа и импозантниот диптих „Македонија – светла земја“ и „Македонија памети“ на еден од најзначајните современи македонски уметници – академик Глигор Чемерски, поставен на двата ѕида во Мозаик салата.
Учениците присуствуваа и на церемонијата за промена на државното знаме на платото пред Кабинетот, извршена од припадниците на Баталјонот за почести и опслужување на Армијата, што се одржува со цел подигнување на чувството и почитта кон знамето на Република Северна Македонија, како репрезент и симбол на државноста на нашата земја.
Отворен Кабинет е дел од проектот Лице в лице со Претседателот, во рамки на кој, досега Кабинетот го посетиле граѓани од различни возрасти, професии и занимања, студенти од земјава и од странство, како и ученици од основни и средни училишта.