Во рамки на активноста Отворен Кабинет, денеска Кабинетот на претседателот го посетија членови на Младинскиот образовен форум.
Посетителите – средношколци од Скопје, Тетово, Битола, Струга, Велес и Струмица, го информираа претседателот Пендаровски за актуелните проекти во рамки на МОФ, насочени кон поголема вклученост и општествен развој на младите, преку квалитетни младински и образовни политики.
За време на средбата со претседателот Пендаровски разговараа за општествено-политичките прашања во земјата, за перспективата на младите луѓе, а се запознаа и со активностите кои се одвиваат во Кабинетот, со претседателската функција и уставните надлежности.
Посетителите имаа можност да се запознаат со начинот на функционирање на институцијата, да ги разгледаат просториите во коишто се реализираат официјалните и работните средби, свечености и прес-конференции, како и Мозаик салата со импозантниот диптих „Македонија – светла земја“ и „Македонија памети“ изработен од реномираниот уметник, академик Глигор Чемерски.
Отворен Кабинет како дел од проектот Лице в лице со Претседателот овозможува непосредна комуникација на граѓаните со претседателот Стево Пендаровски. Кабинетот досега го посетиле илјадници граѓани од различни возрасти и занимања, членови на организации, студенти од земјава и од странство, како и ученици од основни и средни училишта од земјава.
