Во рамки на активноста Отворен кабинет, денеска Кабинетот на претседателот го посетија ученици од ООУ „Браќа Миладиновци“ од Куманово и ученици oд Италија, Португалија и Полска од ERASMUS проектот „Get ready for the future“.
Учениците се сретнаа и разговараа со претседателот Пендаровски за неговата работа, надлежностите и за активностите во Кабинетот, а ги разгледаа и просториите во коишто се реализираат официјалните и работните средби, како и салите наменети за свечености, состаноци, седници на Советот за безбедност и прес-конференции.
Вработените во Кабинетот ги запознаа посетителите со историјатот на објектот, начинот на функционирање на институцијата, а имаа можност и да ја разгледааат Мозаик салата во која се наоѓа автентичниот диптих „Македонија – светла земја“ и „Македонија памети“ изработен од реномираниот уметник, академик Глигор Чемерски.
Отворен Кабинет е дел од проектот Лице в лице со Претседателот, инициран за да се овозможи реализација на директни средби на граѓаните со претседателот Стево Пендаровски. Во рамки на активноста Кабинетот го посетуваат, граѓани од различни возрасти и области на занимања, организации, студенти од земјава и од странство, како и ученици од основни и средни училишта од земјава.
