Кабинетот на Претседателот на Република Северна Македонија, во рамки на активноста Отворен Кабинет, денеска го посетија дечиња од градинката „Мајски цвет“ од Скопје.
Посетителите имаа можност да се сретнат со претседателот Пендаровски и да поразговараат за неговите желби и омилени активности во детството. Дечињата раскажуваа за нивните секојдневни активности, другарување и сето она што досега го научиле за време на престојот во градинка. Пред претседателот Пендаровски рецитираа стихотворби и ги испејаа песничките коишто ги подготвиле за денешната посета.
Вработените во Кабинетот ги прошетаа низ работните простории на претседателот Пендаровски, како и во Мозаик салата
со импозантниот диптих „Македонија – светла земја“ и „Македонија памети“ на еден од најзначајните современи македонски уметници – академик Глигор Чемерски.
Отворен Кабинет е дел од проектот Лице в лице со Претседателот, во рамки на кој, институцијата ја посетиле граѓани од различни возрасти, професии и занимања, студенти од земјава и од странство, како и ученици од основни и средни училишта. Дечињата од градинката „Мајски цвет“ се, досега, најмладите посетители на Кабинетот на претседателот.