Претседателот Стево Пендаровски денеска оствари телефонски разговор со Претседателот на Република Словенија, Борут Пахор.
Во разговорот, кој се оствари на последниот ден од мандатот на претседателот Пахор беа реафирмирани одличните билатерални односи без отворени прашања, основани на традиционално пријателство.
Претседателот Пендаровски се заблагодари за поддршката од словенечкиот претседател во изминатите 10 години – за времето на двата мандата како претседател на пријателска Словенија, особено насочена за европските интеграции, како на Република Северна Македонија, така и на целиот регион, кои, како што истакна претседателот Пендаровски, се високо на агендата на словенечката надворешно-политичка агенда.
Посакувајќи му добро здравје на словенечкиот претседател и успех во понатамошните ангажмани, претседателот Пендаровски изрази очекување дека стекнатото лично пријателство меѓу двајцата претседатели, а кое се отсликува и во македонско-словенечките односи ќе продолжи и во иднина и рече дека претседателот Пахор секогаш ќе биде почитуван и добредојден во нашата држава како искрен и вистински пријател.