Претседателот Стево Пендаровски, денеска во Вила Билјана во Охрид го прими министерот за надворешни работи на Република Полска и претседавач со ОБСЕ, Збигњев Рау.
На средбата беа разменети мислења за севкупните билатерални односи меѓу Северна Македонија и Полска, при што беше констатирано дека истите бележат позитивен развој, со цврста основа за натамошно унапредување на досегашната одлична соработка.
На средбата претседателот Пендаровски истакна дека Полска е искрен и принципиелен поддржувач на македонските европски интеграции и изрази очекување поддршката да продолжи и во иднина. Двете држави, како членки на НАТО, беше констатирано на средбата, даваат свој придонес за безбедноста и стабилноста на евро-атлантскиот простор.
Претседателот Пендаровски и министерот Рау разговараа и за актуелните состојби во контекст на руската инвазија врз Украина. Претседателот Пендаровски истакна дека Северна Македонија, како одговорна членка на НАТО ќе продолжи да дава поддршка на Украина во рамки на можностите.
На средбата претседателот Пендаровски и министерот Рау разговараа и за тековните активности на полското претседателство со ОБСЕ, вклучувајќи ја и состојбата во Украина, како и за подготовките на претседателството на Република Северна Македонија со ОБСЕ во 2023 година.
