Претседателот Стево Пендаровски денеска беше во посета на Народната банка на Република Северна Македонија, каде оствари средба со гувернерката на Народна банка, Анита Ангеловска-Бежоска, вицегувернерите и со претставници на експертскиот тим.
На средбата беа претставени економските остварувања оваа година и очекувањата и оценките на Народната банка за следниот период, согласно со најновите проекции.
Во таа насока, беа презентирани макроекономските проекции за наредната година, како и предизвиците за периодот што следи. Воедно, се разговараше за општата економска состојба во Северна Македонија и ефектот што го има врз неа движењето на меѓународните пазари.
Раководството на Народната банка го информираше претседателот Пендаровски за тековната монетарна политика која ја спроведува Народната банка, одржувањето на банкарската стабилност, како и исполнувањето на целите на банката во поглед на ценовната стабилност и стабилноста на денарот.
Претседателот Пендаровски во рамки на посетата го разгледа Нумизматичкиот музеј на Народната банка во кој се изложени околу 23 000 примероци на монети и книжни пари од најразлични периоди на македонската историја.
