Претседателот Стево Пендаровски денеска присуствуваше и се обрати на промоцијата на книгата „Помеѓу поделено и едно општество“ на авторите Рубин Земон, Петар Атанасов, Сефер Тахири, Мустафа Ибрахими и Ана Чупеска.
Претседателот Пендаровски, упатувајќи честитки до авторите, оцени дека обработената тема на книгата е подолг период академски и политички провокативна во нашата држава. Претседателот ги адресираше главните предизвици со коишто се соочува нашето општество, а врз основа на неговото досегашно кариерно искуство и личен влог, како портпарол на МВР во времето на конфликтот од 2001-та година, како член на Кабинетот на претседателот Борис Трајковски, преку неговото учество во дебатите за децентрализација, симболи и број на изборни единици според етнички резон, обавување на функцијата претседател на Државната изборна комисија и референдумот против децентрализацијата, како учесник во граѓанското движење со наднационална агенда 2015-2016 година, како пратеник во Собранието во 2017 и 2018 година и учесник во дебатата за Законот за јазици.
Претседателот Пендаровски подвлече дека поделбите во македонското општество се длабоки, дека довербата тешко се дава преку етнички линии, освен ако нема политички договор, а уште потешко се задржува. Таа брзо се губи, додаде Претседателот, не затоа што изборните ветувања биле неискрени, туку дека клиентелизмот е предоминантен – најголем дел од гласачите од сите етникуми бараат нешто за возрат за дадениот глас, а ретко се интересираат за инклузивноста на политиките, рече претседателот Пендаровски. Втора научена лекција, според претседателот е дека внесувањето на мултикултурализмот мора да биде постепено. Тој говореше за донесувањето и имплементацијата на Законот за јазици, за унапредувањата во Армијата и во Агенцијата за разузнавање и влијанието на овие промени кај чувствителни сектори во македонското општество.
Од донесувањето на Рамковниот договор, според претседателот, пробиви има, иако не се доволни. Исчекор во мултикултурата е направен многу повеќе во граѓанската комуникација, отколку во државните институции, оцени претседателот. Вроденото достоинство на човекот е првата одредница од која мораме да тргнеме кога ја обмислуваме политичката заедница во која живееме, порача претседателот Пендаровски.
Проектирајќи ги гледиштата на авторите на книгата, за насоките во коишто треба да се гради Северна Македонија во годините пред нас, претседателот Пендаровски нагласи дека книгата „Помеѓу поделено и едно општество“ е позитивен пример на конструктивен придонес кон нашата заедничка иднина.