Претседателот Стево Пендаровски денеска во проштална средба ја прими Тамуна Лилуашвили, амбасадорката на Грузија во Република Северна Македонија.
На средбата се разменија мислења за билатералните односи меѓу двете држави, актуелните состојби и предизвиците во регионите на Кавказот и Западниот Балкан, како и претстојните активности во рамки на македонското претседавање со ОБСЕ.
Соговорниците изразија задоволство од досегашните билатерални односи и разговараа за продлабочување на соработката во областите од заемен интерес меѓу кои особено се значајни европските и евроатлантските перспективи на двете држави.
Претседателот Пендаровски, заблагодарувајќи се на амбасадорката Лилуашвили за конструктивната соработка и нејзиниот придонес за развој на македонско-грузиските односи, ѝ посака успех во натамошната кариера и ангажмани.
