Претседателката Гордана Сиљановска-Давкова денеска оствари проштална средба со амбасадорот на Обединетото Кралство, Метју Лосон, кому му заблагодари за личната посветеност и проактивност во зајакнувањето на македонско-британските односи.
За Сиљановска-Давкова, Обединетото Кралство претставува долгогодишен и докажан пријател во клучните моменти од поновата историја на нашата земја– од приемот во ОН, членството во НАТО, до процесот на европската интеграција.
Подигнувањето на односите на ниво на стратешко партнерство го оценија како ново поглавје во билатералните односи, коешто отвора простор за поширока соработка во иднина.
Договорот за партнерство меѓу двете влади за инфраструктурни проекти, со којшто се предвидени 6 милијарди евра за стратешки инвестиции, за Сиљановска-Давкова, е една од најзначајните можности што нашата земја ги добила од меѓународен партнер.
На средбата, соговорниците ја реафирмираа важноста на меѓусебната соработка во одбраната, како и во рамките на НАТО.
Во новоформираната Британска бизнис асоцијација во Скопје, обајцата препознаваат можност за продлабочување на економските односи.
Според нив, визното олеснување меѓу двете земји би ги зајакнало врските меѓу граѓаните и би придонело за поголема трговска и академска размена, како и за развој на туризмот.
На прошталната средба, Лосон ѝ се заблагодари на Претседателката за одличната соработка и изрази увереност дека истата ќе продолжи и со неговата наследничка. Во периодот што следи, тој очекува продлабочување на партнерството, преку нови британски инвестиции и проекти поврзани со дигитализацијата, младинските политики и женското лидерство.
На амбасадорот Лосон, Сиљановска-Давкова му посака добро здравје, среќа и понатамошен успех на професионален план.
