Претседателот Стево Пендаровски денеска го прими во проштална средба, шефот на мисијата на ОБСЕ во земјава, амбасадорот Клеменс Која.
На средбата претседателот искажа благодарност за поддршката и активностите на Мисијата, како и за ангажманот на амбасадорот Која во изминатиот период.
Двајцата соговорници разменија мислења за актуелните случувања во земјава, текот на евроинтеграциските процеси во Северна Македонија, како и за активностите на Мисијата на ОБСЕ.
Во таа насока, беше посочено дека ОБСЕ има значајна улога во поддршката на македонските институции, градење на демократските капацитети и во исполнувањето на реформската агенда во сите витални области, како унапредување на човековите права и анти-дискриминацијата, судството, слободата на медиумите, јакнење на безбедноста и мониторингот врз изборниот процес.
Претседателот Пендаровски изрази подготвеност за продолжување и унапредување на севкупната соработка со ОБСЕ во периодот што следи и ги поздрави напорите на Мисијата која годинава одбележува 30 години од постоењето во Северна Македонија како најстара теренска мисија.
