Претседателот Стево Пендаровски, денеска го прими на проштална средба амбасадорот на Унгарија, Ласло Иштван Дукс.
На средбата се разговараше за севкупните билатерални односи, актуелните состојби во регионот, соработката во рамки на НАТО, како и за последните случувања поврзани со нашата евроинтеграција.
Претседателот Пендаровски ја поздрави континуираната соработка со Унгарија, посочувајќи дека Република Северна Македонија високо ја цени унгарската поддршка за добивање на датум за почеток на пристапните преговори со Европската Унија, како и подготвеноста за споделување на експертски искуства. Тој посочи дека за долгорочна стабилност и безбедност на регионот, а во контекст на новите геополитички околности, деблокадата на македонските евроинтеграции и неодложен почеток на пристапните преговори за членство во ЕУ се исклучително важни.
Претседателот Пендаровски се заблагодари за дипломатскиот ангажман и посветеност на амбасадорот Ласло Иштван Дукс и неговиот придонес за унапредување на македонско-унгарските односи и му посака понатамошен успех на личен и на професионален план.