Претседателот Стево Пендаровски во рамки на проектот „Лице в лице со претседателот“, денеска беше во Општина Радовиш.
Во рамки на посетата, претседателот Пендаровски се сретна со претставници на Здружението на инвалиди на трудот. Претседателот на здружението Васко Василев го запозна претседателот Пендаровски со нивните активности околу организирање и учество на републички и регионални спортски игри за трудови инвалиди. Во оваа насока, претседателот Пендаровски им честиташе за шесте последователни пехари кои Здружението на инвалиди на трудот од Радовиш како државен првак ги освоило на Републичките спортски игри. Василев и претседателот Пендаровски поразговараа и за нивното барање за одвојување од останатите пензионери, како и за финансиските проблеми на здружение коешто постои повеќе од 30 години и обединува околу 400 инвалиди на трудот.
Во Радовиш, претседателот Пендаровски го посети средношколецот Матеј Цветковски, кој ги претстави неговите два извонредни концепти за видеоигра на тема „Заштита на животната средина“ кои две години по ред, во 2021 и 2022, се првонаградени во рамки на проектот „Видео игротека“, што го организираат Министерство за култура и УНПАКИ, со цел подигнување на еколошката свест кај младите и промовирање на етички кодекс кон природата. Во разговорот, Матеј го запозна претседателот со неговите планови и амбиции за понатамошното образование, како и со неговите досегашни резултати и успеси во областа на математиката, информатичките и природните науки и уметноста.
При посетата на Радовиш, претседателот Пендаровски оствари средба со граѓани и појде во домот на Бота Хаџи Илиева. Со радовишани претседателот Пендаровски поразговара за секојдневниот живот, го слушна нивното мислење за актуелните случувања, како и за предизвиците со коишто се соочуваат на локално ниво.
