Претседателот Стево Пендаровски денеска прими делегација од Странка на демократска акција на Македонија (СДА), предводена од претседателот на партијата Џелал Хоџиќ, во чиј состав беше и претставник од СДА од Босна и Херцеговина, Адмир Мулаосмановиќ.
На средбата претседателот Пендаровски беше запознаен со активностите и заложбите на партијата со цел натамошно унапредување на правата и интересите на бошњачката заедница, како и за соработката што ја остваруваат со СДА од Босна и Херцеговина и со партиите на Бошњаците од регионот.
Претседателот Пендаровски истакна дека Бошњаците како интегрален дел од македонското општество имаат значаен придонес во демократскиот и економскиот напредок на земјава. Воедно, тој ја реафирмираше неговата поддршка на заложбите за унапредување на правата на сите етнички заедници во земјава, согласно нивните уставно загарантирани права.
Во разговорите беа разменети мислења за актуелните политички случувања во земјава и во Босна и Херцеговина, како и за состојбите во поширокиот регион.
