Претседателот Стево Пендаровски денеска прими претставници на Сојузот на здруженија на пензионери на Македонија.
Претставниците на Сојузот на здруженија на пензионери на Македонија го информираа Претседателот за работата и активностите на нивната асоцијација во која членуваат 53 здруженија на пензионери, а со цел заштита и унапредување на заедничките интереси на корисниците на пензија во државата.
Тие ги истакнаа нивните приоритети кои се насочени за поцелосно и единствено залагање за остварување на правата од пензиско и инвалидско осигурување, за поквалитетна здравствена заштита, за унапредување на културните, спортските и хуманитарните потреби на пензионерите.
Претседателот Пендаровски ги поздрави заложбите на Сојузот на здруженија на пензионери на Македонија, ја изрази неговата поддршка за нивната работа и притоа ја истакна грижата на Сојузот кон своите членови, особено за оние со ниски пензии, преку хуманитарни и волонтерски активности.
На средбата стана збор и за соработката на Сојузот со општините и локалната самоуправа, соработката со други здруженија, невладини организации и фондации, како и со пензионерски асоцијации од други земји.
Во минатата 2021 година, Сојузот на здруженија на пензионери на Македонија прослави 75 години од пензионерското организирање во нашата држава и по тој повод претставниците на Сојузот му врачија плакета на претседателот Пендаровски во знак на благодарност за поддршката.
