Претседателката Гордана Сиљановска – Давкова денеска оствари средба со проф. д-р Огнен Марина, раководител на Центарот за напредни и постдокторски истражувања при УКИМ.
Повод за средбата беа активностите на Центарот што функционира од 2023 година и чија основна цел е да ги поттикне напредните истражувања во областа на одржливиот урбан развој преку промоција на интегриран и мултидисциплинарен пристап.
На средбата, проф. д-р Марина го образложи огромното значење на ваквите Центри за квалитетното образование и наука, презентирајќи успешни компаративни искуства од земјите на Европската Унија како и од земји од соседството. „Неспорни се придобивките од ваквите центри и ние треба да ги ползуваме добрите практики“, потенцираше проф. д-р Огнен Марина.
Образложувајќи ги плановите на Центарот, проф. д-р Огнен Марина информираше и за научниот семинар на тема „Политики“ за урбан развој, што треба да се реализира годинава.
Од своја страна претседателката се заблагодари за споделените информации, ја поздрави досегашната работа на Центарот, го потенцираше значењето на постдокторските истражувања и се заложи за понатамошно градење капацитети за поддршка на истражувачите и иновациите.
Соговорниците се согласија дека постдокторските студии треба да бидат регулирани со Законот за високото образование.
