Претседателот Стево Пендаровски денеска го прими нерезидентниот амбасадор на Република Финска за Република Северна Македонија, Кимо Лахдевирта, на која беа разменети мислења за билатералните односи, можностите за унапредување на соработката, како и за војната во Украина и безбедносната состојба во Европа.
Претседателот Пендаровски се заблагодари за досегашната поддршка од Финска во однос на македонските евроинтеграции, потенцирајќи дека кредибилната политика на проширување и европската перспектива се важна гаранција и инвестиција во мирот, стабилноста и просперитетот на Балканот.
Во однос на руската агресија, претседателот го реафирмираше ставот дека Република Северна Македонија најостро го осудува неоправданиот вооружен напад врз Украина, како напад врз целокупниот меѓународниот поредок.
На средбата беа разменети мислења за активностите кои се преземаат во контекст на бегалската криза и обезбедувањето на поддршка и помош на украинските граѓани, како и за актуелната состојба во скандинавскиот регион и во Финска, како непосреден сосед на Русија.
